ឯកឧត្តម ឃួង ស្រេង ដឹកនាំមន្ត្រីជំនាញចុះពិនិត្យការស្តារប្រឡាយ និងការសាងសង់ស្ថានីយបូមទឹក ដើម្បីបង្កើនប្រសិទ្ធភាពរំដោះទឹកក្នុងរាជធានីភ្នំពេញ
នាព្រឹកថ្ងៃទី១០ ខែមិថុនា ឆ្នាំ២០២៦នេះ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ រួមដំណើរដោយឯកឧត្តមអភិបាលរង មន្ត្រីជំនាញនៃរដ្ឋបាលរាជធានីភ្នំពេញ មន្ទីរសាធារណការ និងដឹកជញ្ជូនរាជធានីភ្នំពេញ ព្រមទាំងអាជ្ញាធរខណ្ឌទាំង៥ បានចុះពិនិត្យលទ្ធផលការងារស្តារប្រឡាយជាច្រើនខ្សែ និងការសាងសង់ស្ថានីយបូមទឹកចំនួន២ទីតាំង ក្នុងភូមិសាស្ត្ររាជធានីភ្នំពេញ។
ការចុះពិនិត្យនេះ គឺជាផ្នែកមួយនៃការតាមដានវឌ្ឍនភាពការងារអនុវត្តផែនការរបស់រដ្ឋបាលរាជធានីភ្នំពេញ ដែលបានដាក់ឱ្យអាជ្ញាធរខណ្ឌ និងមន្ទីរជំនាញពាក់ព័ន្ធអនុវត្តកន្លងមក ក្នុងគោលបំណងបង្កើនសមត្ថភាពរំដោះទឹក កាត់បន្ថយការលិចលង់ដោយសារទឹកភ្លៀង និងការពារលំនៅដ្ឋានប្រជាពលរដ្ឋក្នុងរដូវវស្សា។
ក្នុងឱកាសនោះ ឯកឧត្តមអភិបាលរាជធានីបានពិនិត្យដោយផ្ទាល់លើស្ថានភាពប្រឡាយ ប្រព័ន្ធលូ និងវឌ្ឍនភាពនៃការសាងសង់ស្ថានីយបូមទឹក ដើម្បីធានាថាការងារទាំងអស់អនុវត្តទៅតាមផែនការ និងស្តង់ដារបច្ចេកទេសដែលបានកំណត់។
សកម្មភាពនេះបានបង្ហាញពីការយកចិត្តទុកដាក់ និងការតាមដានការងារយ៉ាងជិតស្និទ្ធរបស់ឯកឧត្តម ឃួង ស្រេង ចំពោះគម្រោងហេដ្ឋារចនាសម្ព័ន្ធសំខាន់ៗដែលពាក់ព័ន្ធនឹងជីវភាពរស់នៅរបស់ប្រជាពលរដ្ឋ។ ការចុះពិនិត្យជាបន្តបន្ទាប់ដោយផ្ទាល់ពីសំណាក់ឯកឧត្តមអភិបាលរាជធានី បានរួមចំណែកជំរុញឱ្យការអនុវត្តគម្រោងនានាប្រព្រឹត្តទៅដោយរលូន ទាន់ពេលវេលា និងមានប្រសិទ្ធភាព។
ជាមួយនឹងការយកចិត្តទុកដាក់លើការកែលម្អប្រព័ន្ធរំដោះទឹក ការស្តារប្រឡាយ និងការសាងសង់ស្ថានីយបូមទឹកបន្ថែម រដ្ឋបាលរាជធានីភ្នំពេញកំពុងបន្តពង្រឹងហេដ្ឋារចនាសម្ព័ន្ធសាធារណៈ ដើម្បីឆ្លើយតបនឹងការរីកចម្រើនរបស់ទីក្រុង និងលើកកម្ពស់គុណភាពជីវិតរបស់ប្រជាពលរដ្ឋឱ្យកាន់តែប្រសើរឡើង។
