លោក សេង គន្ធ ប្រធានកិត្តិយសអនុសាខាកាកបាទក្រហមកម្ពុជា ខណ្ឌមានជ័យ និងជាអភិបាលនៃគណៈអភិបាលខណ្ឌមានជ័យ បានអញ្ជើញជាអធិបតីភាព ក្នុងពិធីប្រគល់ទេយ្យទាន និងទេយ្យវត្ថុ ជូនដល់អនុសាខាកាកបាទក្រហមកម្ពុជា ខណ្ឌមានជ័យ ព្រមទាំងព្រះសង្ឃ នៃវត្តដំបូកខ្ពស់ ក្នុងបរិវេណវត្តដំបូកខ្ពស់។

ព្រះសង្ឃដែលបានទទួល រួមមាន ព្រះគ្រូសិរីសត្ថាចារ្យ ប្រាក់ ឌឿន ព្រះគ្រូសូត្រឆ្វេង និងព្រះលិខិតធម្មនាថ ហាន គឹមសយ ព្រះគ្រូសូត្រស្តាំ។ ពិធីនេះបានប្រព្រឹត្តឡើងក្នុងបរិវេណវត្តដំបូកខ្ពស់ ក្នុងបរិយាកាសស្ងប់ស្ងាត់ និងពោរពេញដោយសទ្ធាជ្រះថ្លា។

ទេយ្យទាន និងទេយ្យវត្ថុដែលបានប្រគល់ រួមមាន អង្ករ ទឹកសុទ្ធ មី ទឹកផ្លែឈើ ព្រមទាំងសម្ភារៈប្រើប្រាស់ផ្សេងៗ និងថវិកាមួយចំនួនផងដែរ សកម្មភាពនេះបង្ហាញពីការយកចិត្តទុកដាក់ និងការគិតគូរយ៉ាងជាប់ជានិច្ចរបស់លោកអភិបាលខណ្ឌ ចំពោះសុខុមាលភាពប្រជាពលរដ្ឋ និងសង្គមមូលដ្ឋានក្នុងខណ្ឌមានជ័យ។ ទន្ទឹមនឹងនេះ ក៏ជាការលើកកម្ពស់សាមគ្គីភាព សប្បុរសធម៌ និងការចូលរួមចែករំលែកក្នុងសង្គមផងដែរ។